مداخيل الشعر وايد ، وانا شاعر ولي مدخال
ولكـن الـمخـــارج ما هي تـشـــابـه مــداخلـها
وانا بين الـمخارج والمداخل يوم طاب الفـال
جـبرت آخر بـيـوت الـمـفردات ينافـس اوّلـها
سبحت من الشعر بحر وملكت من البيوت جزال
وهي ماهـي بْـمـهـنـه ، لكـن افـكـاري تـداولـهـا
من اغلى الإمنيـات اللي من القلب وتمر البـال
صنعت اغلى البيـوت اللي تبيّض وَجه قايلـها
أغذّيـها باحـاسيـسٍ لـها فـي خافـقـي مدهـال
لـها كـفّـي مـطـيـعــــه يوم تـكـتـبـها أنـامـلــهـا
لو ان افكـار شـعري خيل ، ما تلقى لها خيّـال
سوى فكري تحلّـق فـي الفضـا يوم آتخـيّلـهــا
على الدوله وريّسـها (خليفـة ) قـايد الأبطـال
هـماليـل السـحاب اللي غـصـون الأرض بـلّـلـها
أبارك له فـي شهـر ٍنـزّل القـرآن فيـه انـزال
يضـم مْن اللـيـالي لـيـلة الـقـدر وفـضــايـلـها
أردّدها على الاطـلال .. وتردّد معي الاطـلال
يالين اسـمـع صـداهـا والـمـخـالـيق تْـنـاقلــها
لو ان دلّـة هل الأمـجاد ما مـعـها سوى فـنيال
ترى الـفـنيال فـي راحـة يـمـيـنه يا مهـيّـلـها
في كل بلاد له كلمه ، والى من قال قال وْطال
يطول جبال الارض وكف ابو سلطـان أطولـهـا
مع شـعـب الـعروبه مـوقفه تـفخر به الأجيال
والى من مالت احـوال العـرب وقّـف وعدّلـهـا
ولابو راشد من الـمجد التليد العز والإجلال
وْمن الألقـاب أشرف ما حوت الالقـاب وانبلـهـا
(صلاح الدين ) فخـرٍ للعروبه يا هل الأمثـال
وابو راشد (صلاح الدين) لاهل الأرض باكملها
و (ابو خالد ) صنع دوله بهمّـته وْتحته رجال
إلى قالـت ، تبـرهـن قولـها صـادق فـعـايلـهـا
سـلايله الـمكارم ، والفـخر لا من ذكره اختال
وعريـبيـن السـلايل تـفـتخر فـيها سـلايلـهــا
لو ان للطـيـب رجـل يمـثّـله بو خـالـد الرجّـال
يـمـثّـلـه ، وشـيـــــوخ الـدار لـو وقّـف يمـثّـلـهــا
وجبال الأرض لو نـقـدر نسـوّي منّـها تـمثال
لابو خـالـد ، نـحـتـنـاها مـن آخـرها إلى اوّلــها
على الهامات له هامه وعلى حد السحب تختال
صـعـيـبـات الـمشـاكـل كـل مـا جـاته يذلّـلــهـا
وعسى شعب الإمارات العزيزه دوم فـ احسن حال
عسى دعواتهم ربّي فـي شـهر الخـير يقـبلـهـــا