ياللي تسحّـب فوق الامتـان جـاعد
يلـعـب به الـغربي على قـد مـيّـاس

إحذر تـعـد ايّـام لـقـياك واعـد
أيّام بـعـدك والـهـجـر مـالـه قيـاس

سـهـم الـغـــلا ما بيـن نـازل وصـاعد
والـرازق الله ، لـكن الـناس للــناس

عـلّمني وشلـون اهـجـرك ونـتـبـاعد
يالقاسي اللي ما مـعـك أيّـة احساس

ما دام ما حن بالـحـيـاه نْـتســاعد
إضحك من الفرقا ، وعادي ، ولا باس

وش قيمة الغيم ان برق ، وان تراعد
لا صارت غـصــون الـمحبّـين يبّـاس

لا لا تواعـد .. خل عنك الـمواعـد
أنا ترى من حبّـك اعلنت الافـلاس

راح الـعـمر كـلّه وانا مـعـك قـاعـــد
لين الرجـا ماتت عزومـه من اليـاس

كـم كنت انا ويّاك سـاعد بسـاعد
وطوّقـتك بحبّـي مثل عقد الالـماس

على الـغـلا كلّـه ، نـويت آتـقـاعـــد
حتى أعيش الـعمـر من دون وسواس