القلب شال الحب والحب شاله
مدخـل غـرامي والأحاسيس حوله

وضاع الفكر مابين حاله وحاله
واسهل حلوله صارت اصعب حلوله

الحسن لي يفرض علينا سؤاله
كيـف الربيع امتـد لاربع فـصـوله

كيف ابتداه الحسن ثم انتهى له
يا لين حتى الحـسن منـّه خذوا له

وانا اتخـيـّـل في خـيالي خـياله
فرصة عمر تحت إبتسامة طفوله

غرّ ٍ صفا حسنه وقلبي صفا له
سهل التمنـّي بس صعبٍ وصوله

يحـتار فيه اللي يوصّـف دلالـه
ويهين به لي عن جماله حكوا له

يخجل جماله من صفاوة جماله
ويغـيض ربـّات العيون الخجوله

يمـشي معاهـم بس كنـّه لحـاله
معهم ولكن كن هـم لي مشـوا له

واللي تعرّض في مرامي نباله
والله ما يـكـسـب ولا ربـع جـوله

عادل ولكـن ما بـرمـشه عـداله
يظـلم محبـّيـنه بـرمـشـه وطـوله

أصلاً جنوني بس في حب خاله
وشلون لا باوصف تفاصيل زوله

إن قال صـدّي .. قـلت : لله قاله
وان قال وصلي قلت : بالله قـوله

هذا الذي قـلبي من الشوق شاله
مدخل غـرامي والأحاسيس حوله