يشـب الفـكـر بالـمعـنى وهاجـوس القـصيد يثـور
وحـروف الـقـافـيه تسكن لـسـاني واتهـجّـاها

على طاري بحـور الشعـر ياللي تعـشـقـون بحـور
قـصيد الشاعـر اللي يحـسب الكـلمه ومعـناها

يـلامـس كل بيـتٍ من بيـوتـه لهـفـة الـجـمـهــور
قبل تـنزل بصوت الـمطرب اللي شـاد بغـنـّاها

قـصايـد يمتـزج معـنى وصايفها بصدق شـعـور
لـفـت والـفـكـر ساق عـنـانـها والـليـل سـرّاها

تراقـص كنها بنـت الرمـك يـوم الـثـرى ممـطـور
تهـادتها الـقـلوب لـبعـضها والـشــــوق ودّاها

وانا لي من خيـول الـسـبق خـيل ٍ فـعـلها مـذكـور
على صهـوة جـوادي أكسـب الطـولات وارقاها

ولي باهل الصقاره باع ومن أغلى الصقور صقـور
تـنوش الصـيـد لو تـرقى الـسحـابه وتـعـدّاها

ولي في الهجن خير الهجن واسبقها بدون قصور
أصيلة .. كـلما ما لــزّة لها الضـامر تـحــدّاها

اذا قلنا ( اعـمار ) الـمجد يشهد والـجناح يثــور
تروم الـمـسـتحـيـل اللي تـمـنـّتـه و تـمـنـّاها

يـغـطـّيها الصفار تـقول كـنها شـعـلةٍ مـن نـور
مـزاياهـا عـديـدة وانـشـدونـي عـن مـزايـاها

مـفارقـها وسـاع ومن مـفـارقـها ياليـن الــزور
مع طـول رقـبـتـها وصـفـها يـوم آتـحـــلاها

منـارة مـسـجـدٍ مع قـبّـتـه يا عنـقهـا والـكـور
من عـيـون الحـسـود الله يحـفـظـها ويرعاها

متى ما عـرّضـت كـن اكثـريهـا للصـدر منـذور
ولا عـقـب السـنام ووطـيّها الا خـفّ مـوطـاها

فريدة عصر..هالة نصر..صفوة وطر..سمحة طور
تقل كن الله مْن عروق ( ناقة صالح ) انشاها

اذا تورد أعَزل النوق عنها خمس ست شهور
واذا تصـدر أورّدهـن .. واذا تـورد صـدرناها

عـلى مـرباعـها فـزّن ولا رامـن بـحـق و زور
ميـاديـن البـطـولـة ملـكها والهـجـن تـتـلاها

متى ما روّحـت كـن الـرياح الـمقبلات دبـور
بأمـر الله مـســــراهـا و بـأمـر الله مجـراها

ومتى ما نحّـروها واقبلت .. رد الخصم منحور
تـروم تحـمد راعـيها وصعـب تـحـمد عـقباها

تـقـل مـيـدانها ساحة قـتال وفـوقـها تيـمـور
على ضـرب الـدروب الكـايـدة والسبـق ربّاها

اذا قامت تـقـوم لـحالها لو شـوطـها محـشـور
وهي بيـن انـدر الهـجـن الـعـمانيات واقــواها

ما خلقت لآخر الطـابور ، خلقت فـ اوّل الطابور
زعيـمة كاس والسيـف الـمصقّل من ضحاياها

بلا جنحان ما تـقدر تـحلـّق في الفـضا لـطـيور
وهي تـقـدر تـحلّق في الفضا لان الله أعـطاها

ما يكسر تيمها (اعمار) غير (اعمار) يا اهل الشور
كن التيمات مـعـروضـه عـليها وتـنـقـّـاها

أعـشّـيها على كـفـّي محـب وعـاشـق ومـسرور
وهي لـو ودّهـا كـفـّي تـعـشـّاها .. تـعـشـّاها

أجي مفـحـامها جيّـة ظـمان الوادي الـممـطـور
واسـايـرها وتـفهـم نـظـرة عـيونـي وتـقـراها

أسمّـيها بمعـجـزة الهـجـن والاّ بإسم مـحظـور
من اسلحـة الدمـار الشامل الـمحضور مبـناها

هي البحـر الـمحيط الهايج اللي كل موجه سور
أو الـبـرق الـذي من نـاره الـغـيـمة نزل ماها

شـ أسمّـيها وهي أكبر من الأسما .. وانا مـعذور
تعـب فيها الـخـيال وما قدر يكشف مسمّاها

باوصّـفها لـكن من يـقدر يـوصـّف بنات الـحور
بنات الحور في الجنه وهي في الأرض مرباها

لو ان فرعـون مصر اللي بنا الاهرام قبل عصور
حضر مركاضها في الشوط الاوّل يوم سقناها

هدم الاهـرام والأهـرام مشهـورة وهو مشهـور
على هيكل ( اعمار ) اهرام مصرٍ عاد مبناها