أنا في الشعر ابن هذاك إذا إنته تعرف الشعر
أهيّج في البحور أمواج ، أمشّيها على كيفي

واقولّك لا تجاريني ترى أمشي بدربٍ وعر
واذا تبغي تجاريني تـرى لك صامـدٍ سـيـفي

ولا تضمن تحوز النصر وانا بحرٍ وانته نهر
واذا عارضت تيّـاري تبرّى موجي وسِـيفي

وكم من واحدٍ غيرك تعرّض لي وجاه الكسر
ودارت به هبوب رياح في أقوى عواصيفي

تهاجـم سايـل الأقـلام وسطـرٍ ما يهزّه سطر
وإنتـه وينهـا افـكارك عن بيـوتي وتهـديـفي

تبا روس العلا وانته تحوّل في طريقك حدر
تحـاول بس ما تـقـدر بأن توصل مشـاريفي

نجـوم اللـيل ما تـنور إذا بيّـن شعـاع الـبـدر
وش اللي يجمع الوسمي على سحب وْرعد صيفي

تشـوف الجـاذبيّـه لي في هالدنيا تجـرّك جر
أنا عكـسه أفـرّك ويـن ما أبغـي على كـيـفي