تـوبـــــة
ياللي غرامك هـزّني بين الاضـلاع
تـوبه إذا شـقـّيت فـرقاك .. تـوبـه
الله وهبك اوصاف واخلاق واطباع
تسـبي شماليّ الخفـوق وجنـوبـه
نهيت قلبي عن وصـالك ولا طـاع
غـلاك تهـمه والـمـفارق عـقـوبه
وْ في كل مصيافٍ وْ في كل مرباع
وْ في كل وقت وْ كل لحظه ونوبه
من حقـّي اطمع فيك واصير طمّاع
لو دون وصلك يا حبيبي صعوبه
صحيح من ينهل من الشوق يلتاع
يـشرب ولا يقطع ضماه بْشروبه
الهـجـر بدعـه عاطـفـيّه والابــداع
وصلك في ليلٍ يبـتسم لي غروبه
والورد ينبت يوم تمشي على القاع
والصبح أنفاسـك تعـطـّر هـبوبه
