يا أصحابي اللي لكم عندي مكان وْمقام
صاحبكم اللي عليكم طوّلت غيبته
شعوره اللي ف قلبه أصدق مْن الكلام
اللي ما تصعب على فكرته تركيبته
بين السياسه واهلها والغلا و الهيام
والأشقر اللي يموت الخرب من هيبته 
راحت سنين تتابع عام يتبعه عام 
تغرّب ورد داره بعد تغريبته
لو تْغيّـر ملامح وجهه الابتسام 
ما زال يرسم على وجهه مدى طيبته 
يدوّر السلم لانّه من دعاة السلام 
والمستريب يْعرف وش هو سبب ريبته 
لو المصايب كبر ضلع الجبل مايضام
دون الوطن في عيونه تصغر مصيبته 
وعيوننا دون حد بلادنا ما تنام 
الموت حنّا لعين الدار طلّيبته
وان كان للحرب فنجان فقل للكرام
عيال زايد نهار الحرب شرّيبته
الشايب يوصّي غلامه كذا و الغلام
بالنصر وإلا الممات معاهدٍ شيبته
الدار شعب وشيوخ فـ قمّة الالتحام
يسعون للمجد والخايب على خيبته