يالشـاعر بذكر الله تـزين الابيـات
والصدق فيما نزّل الله في الآيات
وآنـا بـذكــر الله و في طـاعـة الله
سخّرت هاجوسي لجل سبك الابيات
كتبت في الطـير وهـداده وفـعله
ومسـابقات الريح والعسـوجيات
واسهبت في وصف الذلول الاصيله
اللي تـحطّــم تيـمـها عشـر مـرات
ومدحت نـاسٍ تسـتحق المـدايـح
واليوم مدحي غير عن كل ما فات
مدحي لمن تـقدّس اسـمه تـعالى
ليس كمثله شي في الماض والآت
الأمـر له مـن قـبل جـــلّ جـــلالـه
والأمر له من بعد ما يـبغي اثـبات
فمـن يـشــاء انّـه يـذلّـه .. يـذلّــه
ومـن يـعــزّه ما يـعـرف المـذلاّت
يا مجري السحب ومغيث الفيافي
الملك لك والعـز في كل الاوقـات
يا ذو الجلال الأوحـد اللي بذكرك
تدعـو جميع الأنبـياء والرسـالات
من هيبتك في قلوب من يعشقونك
المؤمنيـن أهـل القلوب التقـيّات
تسبّـح بذكرك على منـكب ارضك
وتعظّمك لا ناظرت في السماوات
ياللي لجل وجهك نصـوم ونصـلّي
ولولاك ما صـمنا ولا به صـلــوات
يا مـن اذا جـات المضــرّه دعـينـا
بسمك ولا غيرك يزيل المضـرّات
والحمد لك عند المسرَّه وشكرك
واجب على من ينتعم بالمسـرّات
نرجـوك تـغـفر كـل ذنـبٍ جـنيــنا
وندعـوك ترحمـنا بوقـفة عـرفات
يا أيّـها الإنـســـان كثـر المـلــــذّه
تأثّر على الطاعه ، فخف الملذّات
واسـجد لوجه الله تضرّع وخشيه
حتى يـزيـدك في نعـيمه درجـات
بـرعـايـتـه يحـيـطــك الله حــــيًّا
ويرحمك لامن صرت مابين الاموات