الله يسامـحـك عـلى كـل مـا جــاني
القـلب لعـيونـك الثـنـتين أعـذّر به

والا طموحي في راسي واسأل امتاني
أكبر من اللي على شرواك اجاهر به

تـذكـرني ايّـام سـعدي وتـنــاسـاني
في الضيق والـهم واللوعات والـكربه

تدري وش الغربه ؟ انّي داخل اوطاني
واعيش مثل الغريب بديـرة الغربه

لا تعـتذر عـذر ما يقـنع عـلى شـاني
وان كان به عـذر تـكـفى لا تـعذّر به

شخـصي ومـبدع ومـجـنون وآنــاني
وشفايفك جمر يحرق والـهدب حربه

خـصرٍ يهـز القـلـوب وعـود ريّــاني
يـحـقق اكـبر طموحات النظر وربه

لكـن تـذكـّـر بـأن ابـن آدمٍ ثــــاني
والـكـبر صـاحـبه له يـومٍ يـحدّر به

في الحب ساير تعيش الحب وحداني
وتـحارب الناس عقـلك ما تفكـّر به

لا عـاد تـسأل من الأوّل من الـثـاني
والا من اللي خـفـوقي يـفرح بقربه

الأوّل اللي يـعـاني مـثل ما اعـاني
وليا شعرت بلذيذ الشوق يشعربه

واللي خفوقي على شوفته طـرباني
كل الدروب العفـيفه تـطمح لدربه

والا انت مالك حـبيبٍ مثل حـمداني
لو درت في الكون من شرقه إلى غربه

ليه آتـحـدّاك .. لا قـمـت تـحــدّاني
وانا مقامي على النجمات افاخربه