المدح بعض احيان يا صاحب علوم الطيّـبين
وانته رجل مسـلم ونفـسك عارفـين اسـلامها

جاهد بهاجوسك ترى الشاعر جهاده فرض عين
يا امّا نصـر .. والاّ مـمات ومسـكها بختامها

والقافـيه تكـريت والهاجـوس صـدّام الحـسين
وتكـريت ما تاخذ الاوامر غـير من صـدّامها

إلى عظم حجم الحسد فاعظم في عين الحاسدين
العـظـمـاء .. القـبـر نفـسـه يفـتـخـر بعـظامها

أتعـمـلق وْمـالك ومـال العـالـم المـتـقـزّمـين
مـقـامـك العـمـلاق ما تـقـدر عـليـه اقـزامها

جاني من الأجـواد واحد قال أبي بكره تعـين
على التحـدي قـلت هالحمـرا معاك خـطامها

لكن وش يملا عـيون اهل القلوب الطامعـين
رفـع يـديـنـه للسـما .. و أشـّـرت بابـهـامـهـا

والبكـره الصَّـفرا هذيك اللي يراعـيها اثـنين
إللي لو انها تـنعـرض للسـوم محـد ٍ سـامـها

ماهي رخيصة سعر لكن من يسومك يالثمين
تكـفى يابو ( راشد ) أبـيها .. لو عـلا مقامها

وصوفها بين الهجـن تـملا محاجـر كل عـين
شـيخة عـرب واللي حوالـيها فـقـط خـدّامـها

إلى بدا شـوط التحـدّي والعـرب مـتجهّـزيـن
وقامـت هل الاعـلام تـرفـع للّـزوم اعـلامها

تمرّهـم مرور سـبع الغاب في الليـل الـدفـين
الأوّلـــه لـو خـشــمـها ماهـو يـجـي قـدّامهـا

تكـسّر اتـيام الهجـن في كل وقـت وكل حين
واتـيـامـها محـد ٍ يـكـسّـرها ما غـير اتيامها

الله عطاها يوف من كبره تحـسب انها سـمين
والينب واسع وْوجهها ضافي يازين وسامها

وشـعـورها من تحت اذان ٍ كنه إلاّ حربتـيـن
يـديـل بـنـتٍ هـايـمه والـشـوق زاد هـيـامـها

ومْن السـنام لوركها يا صاحبي مقـعـد جنين
ركـّابهـا .. مـن دون آلامـه يــذوق آلامــــها

لان السـنام يْـزين يوم فـقارهـا له نـكـسـتـين
وفـقارها مـسـتور مثـل المحـرمه باحـرامها

والـزور من تحت النحر متـقـلـّطٍ يالفاهـمين
في طبوع هجن الركض والاّ في وصوف اجسامها

ولها كـراسـيـع ٍ وسـاع وبـاطـها مـنـّه يـبيـن
متـقـلــّطة غـارب .. وهذا اللي فهـق سـنامها

وكن خف يدها يـد ظبيّ مْصغـّره صغـر اليدين
دقـيـقـه مْن ذراعـها مـلـمـومـه مْن عـظامها

وكن ذيـلها ميـدول شاميـّه مع عـرضه متين
ينوش الارض ويرفعه م الارض طول اقدامها

صفرا مثل لون الذهب في عنق فتـّان ٍ حسين
والاّ مثل شـمـس الصباح إلى انجلى ظـلامها

لو مخرجين أفلام أصحاب الهجن لمضـمّرين
كان اعرضوا في شاشـة التـلفاز كل افـلامها

قلت استعـذ بالله من الشيطان وابليس اللعـين
النـاس تحـلم بـس ما تـقـدر تـطـول احـلامها

دامك تعـرف اوصافها خير الرجال العـارفـين
من لـوّم العـالـم على نـفـسـه هـو اللي لامـها

شف روح للعزبه وخذ ما تشتهي من كل زين
أمّا هـذي .. عـلي رفـقـه ما تـقـود خـطـامها