أنا قوس القزح في الشعر والوانه
واشكـّل قافـية شعـري بلا تـشكـيل

واعاتـب كل مجـدٍ ضاع عـنوانـه
واجيب لكل وادي سيل وادي سيل

أنا ذاك الشعر لي هاجـت اوزانـه
وانا فارس شعر وامسك عنان الخيل

ومتى قالت مشت في ليل عميانه
أنوّر شعـري بدربه وعـميت الليل

تقول لي (ألو) انت سهيل غلطانه
ترد تـقول لي يا مـرحـبا يا سهيـل

أنا جيت استـفزّ رضاك يا فـلانه
واغايض نهرك الدجله بنهر النيل

واجاذب كل وردة شوق نعـسانه
إذا هـب الهـوى والعـود قام يميـل

أحبّـه لو عـليه الـروح شـرهانه
واموت ف بسمته لو نصّها تمثيل

إذا الصوره شعر والحس قيفانه
وفـرشاة القـصيد تفصّـله تـفصيل

أبا ارسم وردتين وْعـين شيهانه
وقـلبٍ كل ما يـذوّبـه قـلب يـسيـل

وابا ارسم عالمي من دون سكّانه
وانا وضـوّي ودلـّه مبهّره بالهيل

واذا قصدك عن الدمع وعن احزانه
حفـظت الدمعه اللي بلـّلت منديل