ما كنـّك الا شوق في بحر نسيان
كل المـشاعـر قـبل لا اجـيـك لـبّــتـك

قبل المحبّه تنخلق حـس الانسان
كل الحـواس الخـمس يا شوق حبّـتك

وقبل آتعنون صرت للروح عنوان
ما دام هي في وسط الاحساس ربّتك

من سبّتك غيّرت انا إسم (حمدان)
لين عـرفـوني باسـم ( فزاع) سبّتك

تبـقى بمكان ويطـلع البـدر بـمكان
واذا طـلعـت يـضـيع نـوره بهيـبتك

ما انته بلون الشمس وقت المسيّان
أسـتغـفر الله الشمس بالنور صبّـتك

كن العـمر لحـظة إذا معـك سهـران
وكن السهر عـمري بلحظات غيبتك

ان جيت صوبي صرت لك دار واوطان
وان رحت عنّي صرت بعدك وغربتك

قالوا تحت الاضلاع ما تنبت اغصان
قل لي وش اللي تحت الاضلاع نبّتك

قطر الندى يصبح على الورد ولهان
سمّيت طيب الورد من أصل طيبـتك

شفـتـك وعاتـبت اللـيالي والازمـان
ويـن اللــيالي كل هـالـوقـت خـبّـتك

ومن سبّتك غيرت انا إسم (حمدان)
لين اعرفوني باسم ( فزاع ) سبّتك