حـرّاس قلبي يافتى الجود حرّاس
ولا يخطف الخفّاق لو شيّ مدسوس

نبـراس رجـمٍ يعـتلي كل نـبــراس
رابـي ما بيـن البحـر والبـر وطعـــوس

يتحسّب انّه بـدّل الذهب بالمـاس
ضـيّـع حيـاته في رجا شيّ ملـموس

قام يتجرّع كاس هجري على كاس
هذي حـياة اللي به الحـظ منـحـوس

وانا بني ياسي عطا المجد لي راس
ولي عادةٍ ما ألبـس لبـاس ملـبــوس

أبني حياتي فوق ساسٍ على ساس
وانا تـرانـي أفـهـم الخــط مـعـكـــوس

لابـاس يا عـمـر الشقـا فـيك لابـاس
هـذي حـياتـي كـلـّها عـلـــم و دروس

أقـطع رجا من كان يبغي لي الياس
واقـطع بعـزمي لو بعـد تـنقـطـع روس

انت الذي مدّيت لي سهم الاقواس
وانا الذي للسـهم أصـبحت له قــوس

مثل الذي زايد على العوق به باس
أو مثل من يتـبع على الدوس ويدوس

النـاس أجـناس .. ولكـن أبي نـاس
أخـط شاربـهـم مثـل خـطّـت المــوس